म्याक्सिम्याक्स एजुकेसन एजुकेसन माइग्रेसन सर्भिसेसले नेपाली महिला फुटबल टोलीकी कप्तान सवित्रा भण्डारी ‘साम्बा’लाई ब्रान्ड एम्बेसडर नियुक्त गरेको छ ।
साम्बा र म्याक्सिम्याक्सका प्रबन्ध निर्देशक रोजन दनैले सम्झौता पत्रमा हस्ताक्षर गरे । म्याक्सिम्याक्सले ब्रान्ड एम्बासडर ‘साम्बा’सँग ३ वर्षका लागि सम्झौता गरेको हो । साम्बाले म्याक्सिम्याक्सको प्रवर्द्धनमा भूमिका निर्वाह गर्नेछिन् । अस्ट्रेलियाको मेलवर्नमा मुख्य कार्यालय रहेको म्याक्सिम्याक्स एजुकेसन अस्ट्रेलियामा विभिन्न सामाजिक, सांस्कृतिक र खेलकुद गतिविधिहरूमा पनि सक्रिय छ ।
राष्ट्रिय टोलीबाट ६० खेलमा ६६ गोल गरेकी साम्बालाई आफ्नो संस्थासँग जोड्न पाउँदा खुसी लागेको म्याक्सिम्याक्सले जनाएको छ । साम्बाले कुनै कन्सल्टेन्सीको ब्रान्ड एम्बेसडर बन्ने सपना धेरै अघिबाट देखेको र म्याक्सिम्याक्सले त्यसलाई पूरा गरिदिएकोमा धन्यवाद दिइन् । उनले यसले नयाँ पुस्तालाई पनि प्रेरणा मिल्ने विश्वास व्यक्त गरिन् । अखिल नेपाल फुटबल संघ (एन्फा)का महासचिव किरण राईले म्याक्सिम्याक्सलाई धन्यवाद दिँदै यसले अन्य खेलाडी पनि बाटो खुल्ने आशा राखेका छन् । इक्यानका अध्यक्ष शेषराज भट्टराईले साम्बा र म्याक्सिम्याक्सलाई सहकार्यका लागि शुभकामना दिए । निजी क्षेत्रबाट भएको पहलको तारिफ गर्दै नेपाल खेलाडी संघका अध्यक्ष विक्रम लामाले अन्य खेलाडीका लागि पनि यसखालको बाटो खुल्ने आशा व्यक्त गरे ।
नेपालमा क्लब फुटबल नेपाल एपीएफबाट खेलिरहेकी साम्बाले इन्डियन वुमन्स लिगमा सेथु एफसी, गोकुलम केरलाबाट खेलिसकेकी छन् । सन् २०२२-२३ मा गोकुलमलाई इन्डियन वुमन्स लिगको उपाधि उचाल्दा उनले १० खेलमा ३१ गोल गरेकी थिइन् । त्यस्तै साम्बाले इजरायलको होपोइल रानानाबाट पनि खेलिसकेकी छन् । गत वर्ष उनले फ्रान्सको प्रिमियर लिगमा गुइनगाम्पबाट खेलिन् । अब छिट्टै नै अस्ट्रेलियाको प्रिमियर लिगमा वेलिङटन फोनिक्सबाट खेल्नेछिन् ।
