उत्तराखण्डको धराली गाउँमा यही साउन २० गते अचानक आएको बाढीमा २२ जना नेपाली सम्पर्कविहीन भएका छन् । कामको लागि धरालीमा रहेका नेपालीहरु सम्पर्कविहीन हुन् । धादिङका चार, बर्दियाका चार, जुम्लाका एक र जाजरकोटका १३ जना सम्पर्कविहीन रहेको बताइएको छ ।
उक्त बाढीमा हालसम्म पाँचजनाको मृत्यु भएको पुष्टि भएको छ । उक्त घटनामा नौ भारतीय सैनिकसहित ५० जनाभन्दा बढी बेपत्ता भएको भारतीय मिडियाहरूले उल्लेख गरेका छन् । भारतीय मिडियाहरूका अनुसार बाढीपछि धरालीबाट ७० जना, हर्षिलकाबाट १ सय ९० जना र गंगोत्रीबाट २ सय ७४ जनाको उद्धार गरिएको छ ।
बाढीमा परी मृत्यु हुने र उद्धार गरिएको सूचीमा हालसम्म नेपालीको नाम छैन । नयाँ दिल्लीस्थित नेपाली दूतावासका अनुसार भारतले दिएको पछिल्लो अपडेटमा मृत्यु हुने र उद्धार गरिएको सूचीमा नेपाली नागरिकको नाम परेको छैन ।
प्रधानमन्त्री केपी शर्मा ओलीले भारतको उत्तराखण्डमा बाढीले क्षति पुर्याएको दुःखद् खबरप्रति चिन्ता व्यक्त गरेका छन् । उनले बाढीमा नेपाली नागरिक पनि परेको खबर प्राप्त भएको र उनीहरूको उद्धारका लागि दूतावासमार्फत तत्काल कूटनीतिक छलफल भएकोसमेत जानकारी दिएका छन् ।
परराष्ट्रमन्त्री आरजु राणा देउवाले नयाँ दिल्लीस्थित नेपाली राजदूतावासलाई हराएका नेपाली नागरिकको खोजी तथा उद्धारका लागि भारत सरकारसँग समन्वय गर्न निर्देशन दिएको बताएकी छन् ।
उत्तरकाशी जिल्लाको धरालीमा ‘क्लाउड ब्रस्ट’ भई गंगोत्रीको पहाडबाट बग्ने खीरगंगा नदीमा बाढी आएको भारतीय मिडियाले उल्लेख गरेका छन् । तीव्र गतिमा आएको बाढीले ३४ सेकेन्डमा धराली गाउँलाई पुरेको थियो ।
