नेपाल प्रिमियर लिग (एनपिएल)को दोस्रो संस्करणका लागि खेलाडीको अक्सन सूची सार्वजनिक भएको छ ।
आज नेपाल क्रिकेट संघ (क्यान)ले अक्सनमा सहभागी रहने १ सय ५० जना खेलाडीको अन्तिम सूची घोषणा गरेको हो । एनपिएल अक्सनका लागि ४ सय ५८ खेलाडीले दर्ता गराएका थिए । एनपिएलमा सहभागी ८ टोलीले इच्छाएका र क्यानको प्राविधिक टोलीले बनाएको मापदण्डमा रहेका १ सय ५० खेलाडीलाई अन्तिम सुचीमा समावेश गरिएको हो । अक्सन शनिवार हुँदैछ ।
श्रेणी ‘ए’ मा ८ जना, श्रेणी ‘बी’ मा ३५ तथा श्रेणी ‘सी’ मा १ सय ७ खेलाडी रहेका छन् । यसबाट ३७ खेलाडीमा मात्र बोली लाग्नेछ । श्रेणी ‘ए’का लागि ४, श्रेणी ‘बी’का लागि २३ र श्रेणी ‘सी’का लागि १० का लागि बोली लाग्ने क्यानले जनाएको छ । क्यानका अनुसार श्रेणी ‘ए’को खेलाडीलाई न्युनतम १० लाखदेखि अधिकतम १५ लाख रुपैयाँ मूल्य तोकिएको छ । त्यस्तै, श्रेणी ‘बी’लाई न्युनतम ५ लाख र अधिकतम १० लाख तथा श्रेणी ‘सी’लाई न्युनतम २ लाख र अधिकतम ५ लाख मूल्य निर्धारण गरिएको छ ।
एनपिएलको पहिलो संस्करणको अक्सनबाट ८८ खेलाडी (मार्कीसमेत) विभिन्न टोलीमा संलग्न भएका थिए । अक्सनमा बोली लागेका ८८ खेलाडीमध्ये टोलीले दोस्रो संस्करणका लागि ५१ (मार्की समेत) खेलाडीलाई निरन्तरता दिएका छन् ।
