राष्ट्रिय परीक्षा बोर्डले माध्यमिक शिक्षा परीक्षा (एसईई) को नतिजा सार्वजनिक गरेको छ । बोर्डका अध्यक्ष डा. महाश्रम शर्माका अनुसार यस वर्ष ६१.८१ प्रतिशत विद्यार्थी ग्रेडेड भएका छन् ।
गत वर्ष एसईईमा ४७.८६ प्रतिशत विद्यार्थी उत्तीर्ण भएका थिए । बोर्डका अनुसार २०८१ सालको एसईईको नतिजामा १३.९५ प्रतिशतले सुधार आएको छ ।
२०८१ को एसईईमा नियमिततर्फ सहभागी भएका ४ लाख ३८ हजार ८९६ परीक्षार्थीमध्ये ३.६ देखि ४ जीपीए ल्याउनेहरू ४८ हजार १७७ रहेका छन् । त्यस्तै ३.२ देखि ३.६ जीपीए ल्याउने विद्यार्थी ८१ हजार ३८५ जना र २.८ देखि ३.२ जीपीए ल्याउने विद्यार्थीहरू ८९ हजार १२४ जना रहेका छन् ।
त्यस्तै २.४ देखि २.८ जिपिए ल्याउने विद्यार्थीहरू ४८ हजार ४७९ जना र २ देखि २.४ जीपीए ल्याउने विद्यार्थीहरू ४ हजार १२६ जना र १.६ जीपीएदेखि २ जीपीएसम्म ल्याउनेहरू ८ जना रहेको बोर्डले जनाएको छ । १२६ जना परीक्षार्थीको परीक्षा रद्द गरिएको छ ।
गणित कठिन
सबैभन्दा धेरै गणित विषयमा परीक्षार्थी अनुत्तीर्ण भएका छन् । गणित विषयमा १ लाख २८ हजार २१५ परीक्षार्थी अनुत्तीर्ण भएका हुन् । अंग्रेजीमा ८० हजार ६७२ विद्यार्थी अनुत्तीर्ण भए । त्यस्तै, साइन्स एण्ड टेक्नोलोजीमा ७९ हजार २७१, नेपालीमा ५४ हजार ७३५, सामाजिकमा ५३ हजार १८६, अर्थशास्त्रमा ४२ हजार १५० र ऐच्छिक गणितमा १८ हजार २२२ परीक्षार्थी अनुत्तीर्ण भएका छन् ।
ननग्रेड भएका विद्यार्थीहरूका लागि साउन २९ गतेदेखि मौका परीक्षा तोकिएको छ ।
