भारतको ओडिसास्थित कलिंगा इन्स्टिच्यूट अफ इन्डस्ट्रियल टेक्नोलोजी (किट) विश्वविद्यालयमा फेरि अर्की नेपाली विद्यार्थी मृत फेला परेकी छन् ।
उक्त विश्वविद्यालयको स्नातक तह प्रथम वर्षमा अध्ययनरत नेपाली छात्रा वीरगञ्जकी प्रिसा साह बिहीबार साँझ फेला परेकी हुन् । उनको शव कलेज होस्टेलमा फेला परेको थियो ।
गत ४ फागुनमा सोही विश्वविद्यालयमा अध्ययनरत २० वर्षीया नेपाली विद्यार्थी प्रकृति लम्साल पनि होस्टलमा मृत फेला परेकी थिइन् । त्यसपछि विश्वविद्यालय प्रशासनले नेपाली विद्यार्थीहरुलाई अपमानजनक व्यवहार गरेपछि कतिपय नेपाल फर्केका थिए । तर, पछि प्रशासनले माफी मागेका कारण प्रायः सबैजसोले किट विश्वविद्यालयमै अध्ययनलाई निरन्तरता दिएका थिए ।
साह प्रथम वर्षको परीक्षा दिनका लागि विश्वविद्यालयको होस्टेलमै बस्दै आएको बताइएको छ । प्रकृति लम्साल बस्दै आएको होस्टेलमै उनी पनि बस्दै आएकी थिइन् । साहको शव पोष्टमार्टमका लागि अहिले अस्पतालमा राखिएको छ ।
