तिहार सुरु हुनै लाग्दा बिद्युतीय समाग्रीका पसलहरुमा ग्राहको भीड बढ्न थालेको छ । तिहारमा विभिन्न प्रकारका झिलिमिली बत्तीको व्यापार फस्टाउँछ । केही वर्षअघि लोडसेडिङ हुँदा झिलिमिली बत्तीको व्यापार न्यून भए पनि अहिले लोडसेडिङको अन्त्यसँगै व्यापार फस्टाएको हो । तिहारमा उच्च खपत हुने झिलिमिली बत्ती नेपालमा उत्पादन हुँदैन । जसको आयातमा नेपालबाट करोडौं रकम बाहिरिने गरेको छ ।
यस वर्ष तिहारका लागि करिब ६० करोडको झिलिमिली बत्ती आयात भएको नेपाल विद्युतीय व्यवसायी महासङ्घका अध्यक्ष रेशमकुमार देवकोटाले बताए ।
विद्युतीय व्यवसायीले मात्र ४५ करोडको झिलिमिली बत्ती आयात गरेका छन् भने खुद्रा व्यापारीका तर्फबाट १५ करोडको आयात भएको छ । नेपालमै उत्पादन नहुने भएपछि ९० प्रतिशत झिलिमिली बत्ती चीनबाट र बाँकी १० प्रतिशत भारतबाट भित्र्याइएको छ ।
तिहार सुरु भएलगत्तै यस्ता बत्तीको माग बढ्दै जान्छ । बिजुली पसलदेखि विभिन्न खुद्रा पसलमा समेत सिजनल व्यापारका रुपमा यो बत्ती बेच्ने गरिन्छ ।
बाहिरबाट नेपाल भित्र्याइएको कुल ६० करोडको झिलिमिली बत्तीमध्ये करिब १५ प्रतिशत उपत्यकामै खपत हुने अध्यक्ष देवकोटाले बताए ।
