समयमै पानी नपर्दा धान रोपाइँमा ढिलाइ भएको छ । कृषि विभागकाअनुसार यस वर्ष आधा असार सकिंदा धान रोपाइँ गत वर्षको तुलनामा आधाभन्दा बढीले घटेको छ । देशभरको धान रोपाइँको विवरण संकलन गर्ने कृषि विभाग अन्तर्गतको बालीविकास तथा जैविक विविधता संरक्षण केन्द्रकाअनुसार गत वर्ष २२ असार र अहिलेको १७ असारसम्मको विवरण हेर्दा २७ प्रतिशत कम क्षेत्रफलमा कम मात्रामा रोपाइँ भएको पाइएको छ ।
यो वर्ष सरकारले १४ लाख ९५ हजार ८८६ हेक्टर क्षेत्रफलमा धान रोपाइँ हुने अनुमान गरेको छ । तर, १७ असारसम्म देशभर कुल ३ लाख २९ हजार ४३६ हेक्टर क्षेत्रफलमा रोपाइँ सकिएको छ । जुन २२।०२ प्रतिशत मात्रै हो । गतवर्ष यस अवधिमा ४० प्रतिशत भन्दा धेरै क्षेत्रफलमा रोपाइ भइसकेको थियो । यस अवधिमा कर्णाली र सुदूरपश्चिम प्रदेशमा झण्डै आधा क्षेत्रफलमा रोपाइँ सकिएको छ भने धान धेरै फल्ने मधेशमा निकै कम मात्रामा रोपाइँ भएको छ ।
कृषि विभागले मनसुनमा भएको ढिलाइ कारण यो वर्ष रोपाइँ केही ढिलो भएको देखिएको बतायो ।
तर, रोपाइँका लागि पर्याप्त समय भएको र मनसुन पनि सक्रिय रहेका कारण किसानहरु आत्तिनु पर्ने अवस्था छैन । खडेरीका कारण बिउ राख्न केही ढिलाइ भएकाले पनि किसानहरुले बिस्तारै धान रोपाइँ गरिरहेका छन् ।
विभागका महानिर्देशक हरिबहादुर केसी मनसुन ढिलाइले रोपाइँ धकेलिए पनि रोपाइँमा कुनै किसिमको अप्ठ्यारो हुने अवस्था नरहेको बताउँछन् ।
पहाडी जिल्लामा पर्याप्त पानी परेका कारण रोपाइँ राम्रोसँग भएको र तराईको क्षेत्रमा रोपाइँ गर्ने समय रहेको उनको भनाइ छ ।
मधेश, लुम्बिनी र गण्डकी प्रदेशमा पनि किसानहरु रोपाइँ तयारीमा जुटेका कारण केही दिनमा रोपाइँ विवरणमा वृद्धि हुने विभागको अनुमान छ ।
