वैदेशिक रोजगार विभागले वैदेशिक रोजगारीका नाममा ठगी गर्ने ३५२ जना आरोपीको विवरण सार्वजनिक गरेको छ ।
ठगीमा परेका श्रमिकले दिएको उजुरीका आधारमा गरेको अनुसन्धानपछि ३५२ जनाको नाम, ठेगाना र ठगी गरेको रकम सार्वजनिक गरिएको हो । जसमा आकर्षक रोजगारीको प्रलोभनमा युवाबाट ३६ करोड ५७ लाख रुपैयाँभन्दा धेरै ठगी भएको विवरण छ । यसबारेमा थप अनुसन्धान भइरहेको छ ।
विभागले ठगीमा परेको भए यथेष्ट प्रमाणसहित उजुरी दिन पनि आग्रह गरेको छ । विभागका महानिर्देशक मिरा आचार्यले नयाँ सरकार गठनपछि वैदेशिक रोजगारलाई सुरक्षित, व्यवस्थित र मर्यादित बनाउन प्राप्त निर्देशन तथा नेपाली श्रमिकको हकहित संरक्षणका लागि विभागले त्यसैअनुसार काम थालेको बताइन् ।
विभागले गएको चैत १५ मा सूचनामार्फत वैदेशिक रोजगार ऐन, २०६४ को दफा १० बमोजिम इजाजतपत्र बिना वैदेशिक रोजगारसम्बन्धी कुनै पनि काम गरेमा कारबाही हुने चेतावनी दिएको थियो ।
त्यस्तै अभिमुखीकरण तालिमको शुल्क ७०० रुपैयाँ मात्र तोकिएको छ । त्योभन्दा धेरै शुल्क लिएको सूचना आएमा तालिम प्रदायक संस्थाको अनुमति स्वतः रद्द हुनेछ ।
