अमेरिकी राष्ट्रपति डोनाल्ड ट्रम्पले स्थानीय समय अनुसार बुधबार राति देशको इतिहासकै सबैभन्दा लामो (४२ दिन) सरकारी शटडाउन अन्त्य गर्ने विधेयकमा हस्ताक्षर गरेका छन् ।
संसद्ले रिपब्लिकन र केही डेमोक्र्याट सांसदबीच सहमति बनेको उक्त विधेयकलाई पक्षमा २२२ मत र विपक्षमा २०९ मतसहित पारित गरेपछि संघीय निकायहरू पुनः सञ्चालन हुने भएका हुन् ।
यो सम्झौताले आगामी जनवरीसम्मका लागि सरकारी कामकाजलाई सामान्य अवस्थामा फर्काउने बाटो खोलेको छ । तर, डेमोक्र्याटहरूले अफोर्डेबल केयर एक्ट (ओबामाकेयर) अन्तर्गतका कर छुट विस्तार गर्न माग गरेको विषय भने अझै अनिर्णित छ ।
यो शटडाउन ट्रम्प पुनः ह्वाइट हाउस फर्किएपछि कांग्रेसमा डेमोक्र्याट र रिपब्लिकनबीचको सबैभन्दा ठूलो बजेट संघर्ष बनेको थियो । यस अवधिमा करिब सात लाख संघीय कर्मचारीहरूलाई कामबाट हटाइएको थियो । हवाई सेवा कटौती, संघीय फूड स्ट्याम्प्स कार्यक्रम रोकिएको र सैनिकहरूलाई तलब नदिइने अवस्थाले जनजीवन अस्तव्यस्त बनाएको थियो । सरकारी बजेट जनवरी अन्त्यमा पुनः समाप्त हुने भएकाले डेमोक्र्याटहरूले पुनः यही मुद्दा उठाउने तयारी गरेका छन् ।
यो सटडाउनले अमेरिकी अर्थतन्त्रमा ११ अर्ब डलरको क्षति पुर्याएको अनुमान छ । यसले डिसेम्बरको त्रैमासमा आर्थिक वृद्धिदर १ दशमलव ५ प्रतिशतले घटाउने प्रक्षेपण गरिएको छ । सटडाउनका कारण २० हजार उडान रद्द वा ढिलाइ भएको थियो ।
