नेपाली राष्ट्रिय फुटबल टोलीको अन्तरिम मुख्य प्रशिक्षकमा हरि खड्का नियुक्त भएका छन् । अखिल नेपाल फुटबल संघ (एन्फा)का महासचिव किरण राईले सातदोबाटोस्थित मुख्यालयमा आज खड्कालाई नियुक्ति पत्र हस्तान्तरण गरेका छन् ।
सिनियर महिला फुटबल टोलीका पूर्व मुख्य प्रशिक्षक खड्का हाल एन्फामा ‘टेकनिकल डाइरेक्टर’का रुपमा कार्यररत छन् । निवर्तमान मुख्य प्रशिक्षक म्याट रसले बिहीबार मात्र एक बर्षे सम्झौता अवधि बाँकी छँदै पदबाट राजीनामा दिएका थिए । एक दिनपछि एन्फाले खड्कालाई जिम्मेवारी सुम्पिएको हो ।
खड्काको नेतृत्वमा नेपालले एएफसी एसियन कप छनोटअन्तर्गत तेस्रो चरणको खेलमा मलेसियासँग नोभेम्बर १८ मा खेल्दैछ । एसियन कपमा छनोट हुने समीकरणबाट बाहिरिसकेको नेपालले छनोट प्रतियोगितामा बाँकी दुई खेल खेल्न बाँकी छ । पछिल्ला चार खेलमा नेपालले सबैमा हार बेहोरेको थियो ।
