ग्लोबल आइएमई बैंक लिमिटेडले लक्ष्य निर्धारण गरी लक्ष्य अनुसारको रकम बचत गर्न सक्ने ‘गोल बेस्ड सेभिङ’ योजना सार्वजनिक गरेको छ ।
यस योजनामा ग्लोबल आइएमई बैंकको मोबाइल बैंकिङ प्रयोगकर्ताले बचत शुरुआत गरी भविष्यमा गर्नुपर्ने आफ्ना योजनाहरूको सजिलैसँग वित्तीय व्यवस्थापन गर्न सक्ने बैंकले जनाएको छ । यो योजनामा ग्राहकले न्यूनतम ५० हजारदेखि अधिकतम ५ लाख रुपैयाँसम्मको लक्ष्य रकम बचत गर्न सक्नेछन् । यस योजनामा आफ्नो लक्ष्य र लक्ष्य प्राप्तिका लागि आवश्यक रकम निर्धारण गरी बचतको अवधि न्यूनतम ६ महिनादेखि अधिकतम २ वर्षसम्मको लक्ष्य राख्नुपर्ने हुन्छ ।
ग्राहकले आफ्नो निर्धारित लक्ष्य प्राप्त गर्न मासिक कति पैसा बचत गर्नुपर्ने हो, कति ब्याजदर प्राप्त गर्ने हो र त्यो लक्ष्य कति समयमा पूरा हुन्छ भन्ने जानकारी मोबाइलबाटै प्राप्त गर्न सक्नेछन् । यस योजनामा मोबाइल बैंकिङ प्रयोगकर्ताले विभिन्न शीर्षकमा समेत बचत शुरुआत गरी भविष्यमा गर्नुपर्ने आफ्ना योजनाहरूको वित्तीय व्यवस्थापन गर्न सक्नेछन् ।
मासिक आवश्यक रकम सीधै प्राथमिक बचत खाताबाट राख्ने वा आफैँले तोकिएको मितिमा मासिक आवश्यक रकम राख्ने भन्ने विकल्प पनि हुन्छ । साथै ग्राहकले आफूले इच्छाइएको रकमसमेत ‘गोल बेस्ड सेभिङ’ मा टप-अप गर्न सक्नेछन् । यो योजनामा राउन्डअप सेभिङको सुविधा पनि रहेको छ । राउन्डअप सेभिङ अन्तर्गत ग्राहकले हरेक मर्चेन्ट क्यूआर भुक्तानी गर्दा कति पैसा निर्धारित लक्ष्य योजनामा बचत गर्ने भन्ने सुविधासमेत पाउनेछन् ।
राउन्डअप सेभिङमा नियरेस्ट टु, फ्ल्याट र प्रतिशत गरी तीन फरक विकल्प रहेका छन् । राउन्डअप सुविधा ग्राहकले आफनो आवश्यकता अनुरूप सक्रिय तथा निष्क्रिय गर्न सक्नेछन् । साथै विकल्पहरू पनि आवश्यकता अनुरूप परिवर्तन गर्न सक्नेछन् ।
नियरेस्ट टु छनोट गर्दा कतिको नजिकको रकम छनोट गर्ने भनेर उल्लेख गर्नुपर्ने हुन्छ । उदाहरणका लागि २२४ रुपैयाँ मर्चेन्ट क्यूआरमा भुक्तानी गर्दा २५ मा सेट गरिएको छ भने १ रुपैयाँ निर्धारित लक्ष्य योजनामा बचत हुन्छ र ३० मा सेट गरिएको छ भने ६ रुपैयाँ निर्धारित लक्ष्य योजनामा बचत हुन्छ ।
फ्ल्याट रकम विकल्पमा छनोट गर्दा हरेक कारोबारमा कति रकम निर्धारित लक्ष्य योजनामा बचत गर्ने भन्ने हुन्छ । जस्तै १०० रुपैयाँ फ्ल्याट रकम विकल्पमा छनोट गरिएको छ भने हरेक मर्चेन्ट क्यूआरमा भुक्तानी गर्दा १०० रुपैयाँ निर्धारित लक्ष्य योजना बचत हुनेछ ।
प्रतिशत विकल्प छनोट गर्दा हरेक क्यूआर भुक्तानीको रकममा निर्धारित प्रतिशत रकम लक्ष्य योजनामा बचत हुनेछ । जस्तै १० प्रतिशत छनोट गरिएको छ भने २०० रुपैयाँको क्यूआर भुक्तानी गर्दा २० रुपैयाँ लक्ष्य योजनामा बचत हुन्छ । निर्धारित लक्ष्य योजनाको बचत रकममा बैंकले उच्चतम ब्याजदर प्रदान गर्नेछ ।
यस योजनाअन्तर्गत बचत गर्नका लागि बैंकको मोबाइल बैंकिङ प्रयोगकर्ताले ग्लोबल स्मार्ट प्लस एपमार्फत् सीधै बचत गर्न सक्नेछन् । साथै यो योजनामा आबद्ध भएका ग्राहकले निर्धारित समय अघि नै खाता बन्द गर्न सक्नेछन् । साथै यस योजनाको सम्पूर्ण प्रक्रिया आफैँले मोबाइल बैंकिङबाट सञ्चालन गर्न सकिनेछ ।
आफ्नो ‘गोल बेस्ड सेभिङ’को सम्पूर्ण कारोबारको विवरण ग्राहकले ग्लोबल स्मार्ट प्लसमार्फत् हेर्न सक्ने सुविधासमेत रहेको छ ।
