गएको वर्ष विश्वभर १२ करोड ३२ लाख मानिसहरू आफ्नो घरबाट जबरजस्ती विस्थापित भएका संयुक्त राष्ट्रसङ्घले जनाएको छ । विश्वभर आफ्नो घरबाट जबरजस्ती विस्थापित हुनेहरूको सङ्ख्या केही घटेको तर अस्थिर रूपमा विस्थापितहरूको सङ्ख्या भने उच्च रहेको संयुक्त राष्ट्रसङ्घीय शरणार्थी उच्चायुक्त (यूएनएचसीआर) को प्रतिवेदनले जनाएको छ ।
प्रतिवेदन अनुसार गएको वर्ष विश्वभर ६७ मध्ये एकजना जबरजस्ती विस्थापित भएका छन् । सन् २०२३ को अन्त्यको तुलनामा विस्थापितहरूको सङ्ख्या ७० लाख अर्थात् ६ प्रतिशतले बढेको छ । यद्यपि यूएनएचसीआरले यस वर्षको पहिलो चार महिनामा जबरजस्ती विस्थापन घटेर अप्रिल २०२५ को अन्त्यसम्ममा १२ करोड २१ लाख पुगेको अनुमान गरेको छ ।
विस्थापित भएकामध्ये ७ करोड ३५ लाख द्वन्द्व वा अन्य सङ्कटका कारण आफ्नै देशभित्र आन्तरिक रूपमा विस्थापित भएका प्रतिवेदनमा उल्लेख छ । विस्थापनको मुख्य कारण सुडान, गाजा, म्यानमार र युक्रेनजस्ता देशमा देखिएका ठूला द्वन्द्वहरू रहेका यूएनएचआरसीको निष्कर्ष छ ।
सन् २०२४ मा विश्वव्यापी रूपमा जबरजस्ती विस्थापित भएका मानिसहरूमध्ये एक तिहाइभन्दा बढी अर्थात् १ करोड ४३ लाख सुडानी छन् । यस्तै विस्थापित हुनेहरूमा सिरियाली, अफगानी, युक्रेनी पनि उल्लेख्य सङ्ख्यामा छन् ।
प्रतिवेदनका अनुसार यस वर्षको पहिलो महिनामा घर फर्कने सिरियालीहरूको सङ्ख्या बढेको छ । मे महिनाको मध्यसम्ममा ५ लाखभन्दा बढी सिरियाली देश फर्किएको अनुमान छ ।
प्रतिवेदन अनुसार विस्थापितमध्ये सबैभन्दा धेरै ३५ लाखलाई इरानले शरण दिएको छ । यस्तै टर्किए, कोलम्बिया, जर्मनी, युगान्डामा धेरैले शरणार्थीका रूपमा आश्रय लिइरहेका छन् ।
