सरकार परिवर्तन हुने भएपछि सेयर बजारमा उच्च बृद्धि आएको छ । नेपाली कांग्रेस र नेकपा एमाले मिलेर सरकार बनाउने सहमति भएपछि मंगलबार सेयर बजारमा रौनकता छाएको हो । लगातार घटिरहेको सेयर बजार आज दुई पटक सकारात्मक सर्किट लागेर तल झरेको हो ।
बजार खुलेको एक मिनेटमै ४ प्रतिशतले बजार बढेर २० मिनेटको लागि बन्द भयो । २० मिनेटपछि फेरि खुलेको बजारमा दोस्रो पटक पनि सर्किट लागेर ४० मिनेटको लागि बन्द भयो । सो पछि भने बजार तल झर्यो । उतारचढावमा रहेको मंगलबारको बजार अन्तिममा ४७.०४ अंकले बढेर बन्द भएको छ । आज नेप्से २.२९ प्रतिशतले बढेर २१००.४३ विन्दुमा बन्द भएको हो । कारोबार रकम पनि अघिल्लो दिनको तुलनामा बढेको छ ।
सोमबार दुई अर्ब ९९ करोड ९९ लाख ६५ हजार २१ रूपैयाँको सेयर कारोबार भएकोमा मंगलबार चार अर्ब ५७ करोड ६८ लाख ३१ हजार ७२० रूपैयाँको सेयर कारोबार भएको छ । अघिल्लो दिनको तुलनामा कारोबार रकममा १ अर्ब ५८ करोड रूपैयाँ वृद्धि भएको हो । आज ३१५ वटा धितोपत्रको एक करोड १६ लाख ४५ हजार ९०५ कित्ता सेयर किनबेच भयो ।
आज कारोबार भएका १३ वटा समूहगत परिसूचकमध्ये सबै समूहको परिसूचक बढ्दा समग्र नेप्से बढेको हो ।
