कास्कीका पाँच सहकारीमा जम्मा गरेको बचतकर्ताको करिब तीन अर्ब रकम जोखिममा परेको छ । ती सहकारीमा बचतकर्ताको दुई अर्ब त्रियासी करोड सैँतिस लाख एकहत्तर हजार जोखिममा परेको हो ।
यी सहकारीका सञ्चालक बिरुद्ध तीन हजार छ सय बचतकर्ताले प्रहरीमा उजुरी दिएका छन् । सूर्य दर्शन बचत तथा ऋण सहकारी, शिव शिखर बहुउद्देश्यीय सहकारी, इमेज बचत तथा ऋण सहकारी, बलिदानी बचत तथा ऋण सहकारी संस्था र मीत्र मीलन बचत तथा ऋण सहकारीका बचतकर्ता र सेयर सदस्यले कर्मचारी र सञ्चालकहरूले ठगेको भन्दै उजुरी दिएका हुन् ।
शिव शिखरका कर्मचारी र सञ्चालक गरी ११ जनाविरुद्ध एक हजार एक सय ३९ जनाले उजुरी दर्ता गराएका छन् । इमेजका १५ जनाविरुद्ध पाँच सय २४ जनाले, सूर्य दर्शनका १९ जनाविरुद्ध एक हजार ३४ जनाले, बलिदानीका १५ जनाविरुद्ध एक सय ९८ जनाले र मीत्र मीलनका ३२ जनाविरुद्ध ७ सय १४ जनाले उजुरी दिएका हुन् ।
यसरी उजुरी परेकाहरूलाई पक्राउ पुर्जी जारी भएको छ भने पक्राउ पुर्जी जारी भएकाहरू धेरैजसो फरार छन् । शिव शिखरका पूर्व अध्यक्ष केदारनाथ शर्मा, व्यवस्थापक लीलानाथ गौतम, सदस्य अमीराज भण्डारी र अर्का सदस्य पुष्कर मल्ल पुर्पक्षका लागि कारागार चलान हुँदा बाँकी अभियुत्त भने फरार छन् ।
सूर्य दर्शन बचत तथा ऋण सहकारीका १९ जनालाई पक्राउ पुर्जी जारी भएको छ । कोषाध्यक्ष कुमार रम्तेल पुर्पक्षका लाग थुनामा रहँदा बाँकी सबै फरार छन् । यस्तै, इमेज बचत तथा ऋण सहकारीका सञ्चालक र कर्मचारी गरी १५ जनालाई पक्राउ पुर्जी जारी भएको छ । तीमध्ये अध्यक्ष चित्रबहादुर भण्डारी, सदस्य विमला गुरुङ, लेखा समति संयोजक शक्त किसान, लेखा समति सदस्यहरु भूमि भण्डारी, निशा कार्की र विष्णु पौडेललाई प्रहरीले पक्राउ गरेको थियो ।
पक्राउ परेकामध्ये दुई जना पुर्पक्षका लागि थुनामा जाँदा चार जना धरौटीमा रिहा भएका छन् । बाँकी नौ जना भने फरार छन् ।
बलिदानी बचत तथा ऋण सहकारी संस्थाका १५ जना विरुद्ध पक्राउ पुर्जी जारी भएकोमा अध्यक्ष अजय श्रेष्ठ, उपाध्यक्ष राजन लम्साल, कोषाध्यक्ष सुवर्णमान नकर्मी, सदस्य डिल्लीराम सिग्देल र लेखा समति सदस्य सचिना थापालाई प्रहरीले पक्राउ परेको थियो । तीमध्ये तीन जना पुर्पक्षका लाग थुनामा र दुई जना धरौटीमा छुटेका छन् । बाँकी १० जना फरार छन् ।
मित्र मीलन बचत तथा ऋण सहकारीको ठगी अभियोगमा ३२ जना विरुद्ध पक्राउ पुर्जी जारी भएको छ । तीमध्ये अध्यक्ष रमण पौडेल, सदस्य गोपाल खनाल, कार्यकारी अधिकृत किरण अधिकारी, सल्लाहकार सदस्य राजु बराल र सेयर सदस्य बुद्धि सागर पौडेललाई प्रहरीले पक्राउ गरेको छ । बाँकी २७ जना फरार छन् ।
पक्राउ परेकाहरु माथि अनुसन्धान र फरारहरूको खोजी भइरहेको कास्कीका प्रहरीले जनाएको छ । मित्र मीलन सहकारीबाट सर्वसाधारणको रकम ठगी गरि फरार हुनेमा पोखरा महानगरपालिका- २१ का अध्यक्ष दीपक सुवेदी छन् ।
